الخرطوم : نادوس نيوز
بقلم : محيي الدين شجر
حينما فكرنا في اصدار موقع الكتروني (صحيفة الكترونية ) نقبنا في مئات الاسماء التي تشير الى السودان او سماته او صفاته ووجدنا ان اكثرها مسجل في قوقل حتى مدنا الشاعر الكبير عمار سيد احمد شليعة باسم نادوس وقال انه يشير الى السودان ..(ن ا د و س ) حروف السودان اذا قرأت من اليسار الى اليمين ولقد اثبتها الشاعر الكبير محمد الحسن سالم حميد في قصيدة رائعة عبر فيها عن حبه للسودان ..ويقول حميد في قصيدته
والتي جاءت باسم (نادوس )
ايوة بحبك حباً جما
وياما بعزك يا نادوس
ساقات حنك فيهن منك
ومني المشق والقادوس
يا ترقوة الحلم الواحد
من شرا ريح الزمن السوس
ايوة بحبك حباً جما
وياما بعزك يا نادوس
احبك وانتي ماساتي
في زولا حب ماساتو
بحبك صاح
احبك يا ندى الاصباح
يا بهجة صدى الافصاح
شايلك وفكرو شقيش راح
عيونك ياها ناساتو
احبك وانتي ماساتي
في زولا حب ماساتو
بحبك من زمن مو اسع
واحبك لزمن لسع
يا عشم البدو النجع
قاصدك ومستحيل يرجع
قلب تالاكي خطواتو
احبك وانتي ماساتي
في زولا حب ماساتو
صحيح يا دفة التاريخ
فقدتك وروحي مشتاقة
فقدتك الا ما نهنه
ولا قلت دنيا فراقا
لاني على يقين أنك
حترجعي يوم وحنتلاقي
حنتلاقى وشديرة الالفة زي اول
تدنقر فوقنا باشواقا
خطاوينا الزمن صنت
يعربد تانى ساساقا
ليالي الحن تطول تغزر
وراك ما باتت افراقا
حنتلاقي وهجيرة الغيبة من فوقنا
تبارى الشوفة رقراقا
الاقيك انا الطولت راجيك
انورق في الزمن ضايق
متين يكمل والاقيك
انا البستنى جية الليل
عشان انجع مناجيك
واصن جنب نجمة راجيك
حزين لكني مطامن
مشارط للزمن فيك
مغالط وحاشا ما خنتي
ولا هنتي وبلاك انتي مباديك
اعيش ساكت واموت ساكت
حروفاً لي عيوناتن تدوخ الدهشة بيناتن
وسط لجة عيون الكل
عيونك زي عصا موسى
بريدك يا شديراتن
تقوم فجراوى مريوقة
تقطع للهجير فوقا
عشان تدي التعابة الضل
احبك وانتي ماساتي
في زولا حب ماساتو
في ميلاد نادوس
وكتب الشاعر عمار شليعة قصيدة في ميلاد الموقع الالكتروني قال فيها :_
يا نادوس يا أيقونة السودان ما نادوا
كما للأرض أوتاد علامات و أبعاد
كذا للأرض أجداد و آباء و أحفاد
و سادات بها من فوقها سادوا
و أقوام بها من فوقها بادوا
و أحياء بها من عندها هادوا
و صابئة بها من تحتها حادوا
و أرواح سمت ناطت بما رادوا
و أبدان هوت ضعفاً و أجساد
و أحرار مشوا في أرضها صادوا
و هذي الأرض إنباء و إخبار و إنشاد
و أنباء لما فعلوا و ما كانوا و ماكادوا
و يا نادوس أنت منصة الإسفير ما ارتادوا
لأنت أثيره المخطوط و المقروء و الزاد
و أنت لثورة الإعلام في السودان ميلاد
عمار سيداحمد شليعة
21 أكتوبر 2021
ومؤخرا مدنا الزميل والاخ ابو عبيدة عبد الله مدير تحرير صحيفة الصيحة بصورة التقطها بكاميرته لاحدى حافلات الخرطوم مكتوب فيها نادوس مما يشير الى ان الاسم معروف على نطاق واسع ..