الخرطوم : نادوس نيوز
كتبت الصحافية صباح احمد على صفحتها بالفيس بوك عن زوجها الذي اختار الاغتراب والهجرة بعد ان ضاقت عليه الحياة بالسودان وكان زوجها الصحافي الهادي قد اختار الرحيل وكتب معلقا : ها انا ذا افر من قدر الله الى قدر الله ..
حيث كتبت صباح قائلة :
#بوستات_حراق_الروح
للهادي كلمة.. ولي كلمتان!
واحدة من الحاجات الكعبة عند الهادي إنو زول مسكين وما بشكي .. حتي أنا احيانا بكتم عني وما بوريني مشاكله ولا همومه..
زول سكوت وصبور وكل مصيبة بتجيه بعصرها في مصارينه..
و حتي هو شغال ما بكون عنده حق المواصلات بتصل علي عشان احول ليه رصيد يبيعه في محل اتصالات عشان يرجع البيت ومرات بدقها كداري لمسافات طويلة ..
ما بحب يكلف زول نهائي ..طبعه كده وما تطبع..
الحاجة التانية إنو ما بقدر يعيش في جو الحفر والقص والحركات البعملوها بعض الحاسدين وبحاول يبعد وينأي بنفسه من القيل والقال والقطيعة ونقل الكلامات والوساوس والقوالات وده يمكن السبب الخلاه يستقيل من كم جريدة وهو في موقع المحرر العام او مسئول القسم السياسي ومرات بكون سادي سهرات أخبار يستقيل ويجي يلزم بيته ويقعد..
اتعرض لمضايقات كتيرة لمن حسبنا عدد البلاغات المفتوحة ضده في نيابة الصحافة والمطبوعات لقيناها 25 بلاغ وعدد القضايا المشت محكمة الصحافة والمطبوعات الصحفية ومحكمة المعلوماتية حصلت أكتر من 10 قضايا وكلها كيدية ومحاولات لتعطيله وعرقلته بدليل أنها يا بتتشطب أو بكون الحكم فيها لصالحه ده طبعا غير استدعاءات جهاز الأمن والمخابرات والله تحصل قريب 7 استدعاءات وطلب حضور وتحقيق ومعاناة وتضييق وهو صابر ومتحمل..يواجه كل هذه الصعوبات بشجاعة لا انهار لا انكسر لا اصابه الجزع ولا اتجرس ولله الحمد
.. أضف لي كده بتجيه تهديدات بالقتل والذبح والاغتيال والتصفية..ما بخاف ولا بخشي رغم اني حذرته وكمان في أصدقاء مقربين نبهوه إنو يعمل حسابه ومرات في متهورين اعتدوا عليه بالضرب والتهجم و عفاهم لوجه الله رغم اصراري إنو ديل لازم يتأدبوا وبالقانون عشان ما يكرروا فعلتهم لكن هو قال لا العفو والعافية والمسامح كريم و
باختصار..لئن أخطئ في العفو خير من أن أخطئ في الحكم..
وكم مرة قبضوا عليه وحبسوه يجي راجع عادي وليس في قلبه مثقال ذرة من حقد ده طبعا غير الشتائم والنبذ والإساءات ورسائل التهديد وهو محتسب .
– اتخيلوا يا مؤمنين الهادي ما حصل اعتذر لي زميل جميع الزملاء والزميلات وبلا إستثناء البطلبوا منه الإفادات والإجابة علي الأسئلة والاستفسارات سواء في الصحف المحلية أو العالمية ووكالات الأنباء أو القنوات الفضائية الداخلية والخارجية والمواقع الإلكترونية والصحافة الرقمية ومراكز البحوث وطلاب الدراسات العليا وما قاعد يشيل منهم قروش.. ولمن الضيق زاد عليه وتم منعه من الكتابة واتقفلت الابواب في وشه وانعدمت الخيارات وضاقت عليه الأرض بما رحبت فر الناس منه كفرارهم من الاجرب من هو قريب بالداخل ومن هو بعيد في دار هجرة علي حدا سواء الا من رحم ربك ..وكلهم بعرفوه وعندهم معاه علاقة قوية تنكروا له وكأنهم لا يعرفونه فحسبنا الله ونعم الوكيل ..
